އަސަރުގަދަޚުޠުބާއެއް އަޑުއަހަންބޭނުމެވެ.

މީހަކު ހުކުރު ޚުޠުބާއަޑުއަހާ ހިތުން ހުކުރު ދުވަހަށް އިންތިޒާރުކޮށްފާނެހެއްޔެވެ؟ ނުވަތަ ޚުޠުބާއަޑުއަހަމުން ދާއިރު އެޚުޠުބާއަވަހަށް ނިންމާނުލާ ކުރިޔަށް ގެންދާނެނަމަ ކިހާ ރަނގަޅުހޭ ހިތާފާނުހެއްޔެވެ؟

މިސުވާލުތަކުގެ ޖަވާބުގައި އަޅުގަނޑު ދަންނަވާނީ ރާއްޖޭގައި ނަމަ ހަމަ ޔަޤީނުންވެސް ނޫނެކޭއެވެ. ރާއްޖެއިން ބޭރުގައި ނަމަ ނޫނެކޭ ދަންނަވާކަށް ނުކެރޭނެއެވެ.

ހުކުރު ޚުޠުބާ އަކީ އޭގެ ސަބަބުން އިސްލާމީ މުޖުތަމަޢަށް ވަރަށް އެކަށޭނަ އަސަރެއް ކުރުވިދާނެ އެއްޗެކެވެ. އެހެންނަމަވެސް ދިވެހިރާއްޖޭގައި އެކަން އެގޮތަށް ވާހެނެއް ހިޔެއްނުވެއެވެ.

އަޅުގަނޑު އެންމެ ކުޑައިރުއްސުރެ ހުކުރު ޚުޠުބާކިޔާވަގުތު މިސްކިތުންފެންނަނީ ގިނަބަޔަކު ތާއްޔާޖެހިޖެހި ތިބޭ މަންޒަރެވެ. އޭރު ހީކުރެވެނީ އެމީހުން ނިންޖަށް ބަލިވެފަ ތިބޭތީ ވާގޮތެއްކަމުގައެވެ. އެކަމަކު އެމީހުންނަށް އެނިދެނީ އިވޭ "ނާނާ" އެއްގެސަބަބުންކަން އެނގުނީ ތަންކޮޅެއްފަހުންނެވެ. އަޅުގަނޑު ހަނދާން ހުންނަންފެށީންސުރެ  ދާދި ފަކަހާޖެހެންދެން އެއް ޚުޠުބާތަކެއް ތަކުރާރުކޮށް ކިޔެމުންދިޔައެވެ. ތަކުރާރުކޮށް ކިޔަމުންދިޔަލެއް ގިނަކަމުން ޚުޠުބާއަޑުއަހާމީހުންނަށް ޚުޠުބާތައް ހިތުދަސްވެ ޚަޠީބުމީހާ ޚުޠުބާއިން ތަންކޮޅެއް ގޯސްކޮށްކިޔައިފިނަމަ ރަނގަޅުކޮށްދެވޭހާ ވަރުވިއެވެ. ކުރިން،ތަކުރާރުވީހާގިނައިން ނުވިކަމުގައިވިޔަސް މިހާރުވެސް ޚުޠުބާތައް ތަކުރާރުވަމުން އެބަދޭމެއެވެ.

ޕޯޑިއަމްތައް ދޮށަށް ހުއްޓި ބައެއް ވާހަކަދެއްކުންތެރިންގެ ހުށައަޅާ ތަޤުރީރުތަކަކީ އޭގެ ސަބަބުން އަޑުއަހާ މީހުންގެ ހިތްތަކުގައި އާދަޔާ ޚިލާފުޖޯޝަކާއި ޝައުޤުވެރިކަމެއް އުފައްދާ ތަޤުރީރުތަކެކެވެ. އޭގެ ސަބަބުން ހަމަ ކުޑަހިނދުކޮޅެއްގެ ތެރޭގައި މީހާގެ ވިސްނުން ބަދަލުވެ، ރަނގަޅު ގޯހަށްވެ އަދި ގޯސްރަނގަޅަށް ވެދެއެވެ. ޕޯޑިއަމްދޮށަށް ހުއްޓި ލިޔެފައިވާ ލިޔުމެއް ކިޔާލުމަކުން އެފަދަ އިޙުސާސްތަކެއް އުފެދިގެން ދިޔުމަކީ ވަރަށް ނާދިރުކަމެކެވެ.  ޚުޠުބާ އަކީ ދޭންޖެހޭއެއްޗެކެވެ. ތަޤުރީރުދޭހެންނެވެ. އެއީ ޙަޤީޤަތުގައި، ކިޔާ ނުވަތަ ކިޔަންޖެހޭ އެއްޗެއްނޫނެވެ. އެހެންނަމަވެސް ދިވެހިރާއްޖޭގައި ޚުޠުބާ އަބަދުވެސް ކިޔާނީއެވެ. ލިޔުމެއްބަލައިގެންވެސް ޚުޠުބާ ކިޔާނީއެވެ. ލިޔުމެއް ނުބަލާވެސް ޚުޠުބާ ކިޔާނީއެވެ. ރަދީފު ބައްލަވާށެވެ. ޚުޠުބާދިނުން އެއަކު ނޯންނާނެއެވެ. މޮޅު ވާހަކަދެއްކުންތެރިން ތަޤުރީރުތައް ދޭފަދައިން އަޑުއަހާ މީހުންގެ ހިތްތަށް އިސާހިތަކު ބަދަލުކޮށްލާފަދަ ޚުޠުބާތައް ދެވިދާނެއެވެ. އަސަރުގަދަޚުޠުބާގެ އެހީގައި މީހުންގެ ހިތްތަށް މަޑުމޮޅިކުރުވައެވެ. ލޯތައް ތެއްމާލައެވެ. ވިސްނުން ބަދަލުކުރުވައެވެ. ޢަމަލަތައް ބަދަލުކުރުވައެވެ. މީހާ ހަމަމަގަށް ގެނުވައެވެ.

ދެން އޮތީ ޚުޠުބާގެ މައުޟޫޢެވެ. ސުރުޚީއެވެ. އޭގައި ހިމެނޭ ވާހަކަތަކެވެ. މިވެސް އޮންނަނީ ވަކި ތައްގަނޑަކަށް ފެތި ނިމިފައެވެ.  ކުރީގަވެސް އެގޮތަށެވެ. މިހާރުވެސް އެކަހަލަ ގޮތަކަށެވެ. ކުރީގައި ނަމަ މުޙައްރަމްފަސް ފެށުނީއްސުރެ ނިމެންދެން އޮންނާނީ ހިޖުރައިގެ ވާހަކައެވެ. ދެން ދުވަސްކޮޅަކުން އޮންނާނީ ރަސޫލު(ޞ) ގެ ޢީދުމީލާދު ވާހަކައެވެ. ދެން އޮންނާނީ އިސްރާއާއި މިޢުރާޖުގެ ވާހަކަތަކެވެ. ދެން ޤިބުލަބަދަލުކުރެވުނު ގޮތުގެ ވާހަކަތަކެވެ. ދެން އެއަށްފަހު ރޯދައެވެ. އޭގަފަހުގައި ހަރޯދައެވެ. ދެން އެންމެ ފަހުން ޙައްޖުގެ ވާހަކަތަކެވެ. އަނެއްކާ ބުރު އަލުން ފަށަންވީއެވެ. ކޮންމެއަކަސް މިސުރުޚީތައް ކަނޑައެޅިފައި މިވަނީ ހިޖުރީ މަސްތަކާއި ގުޅުވައިގެންނެވެ. ތަފާތު އެހެން ސުރުޚީއެއްގެ ޚުތުބާއެއް އަޑުއިވޭނީ މިސުރުޚީތަކާގުޅޭ މައްސަރުތައް ފިޔަވައި ދެން އޮންނަ މަސްތަކުގައެވެ.

ދެންއޮތީ މިހާރަށް ބަލައިލުމެވެ. އެގޮތުން މިހާރު އަދި ކުރިއަށްވުރެވެސް ވަކުސުރުޚީއެއް ކަނޑައެޅިފައިވާ ހުކުރުދުވަސްތައް މާގިނަހެން ހީވެއެވެ. މިހާރު މުޙައްރަމު މަހު އެއްކޮށް ހިޖުރައިގެވާހަކައެއް އަޑެއް ނީވެއެވެ. ޤިބުލައިގެ ވާހަކައިގެ ސަބަބުން ޝަޢުބާން މަސް އަދި ނުނިމިގެން އުޅޭކަން އިނގޭކަށް ނުޖެހެއެވެ.

މިހާރު "މުޞީބާތެއްހެން" ލައިގެނަގެން މިއުޅެނީ ރާއްޖޭގައި ނުވަތަ މުޅިދުނިޔޭގައި ފާހަގަކުރާ އެކިދުވަސްތަކެވެ. އެދުވަސްތައް ފާހަގަކުރާން އަހަރެއްގެ ތެރޭގައި މިއޮންނަ 365ދުވަސް އެބަ މަދުވާހެންވެސް ހީވެއެވެ. ހަފުތާގެތެރޭގައި އަންހެނުންގެ ދުވަސް ފާހަގަކޮށްފިނަމަ ހުކުރު ޚުޠުބާގެ ސުރުޚީއަކީ އަންހެނުންނެވެ. ކުޑަކުދިންދުވަސްފާހަގަކޮށްފިނަމަ ސުރުޚީއަކީ ކުޑަކުދިންނެވެ. ހަފުތާގެ ތެރޭގައި 5 ޖޫން އަތުވެއްޖެނަމަ ސުރުޚީ އަކީ ޕްލާސްޓިކް ކޮތަޅާއި ތިމާވެށްޓެވެ. ފެނުގެ ދުވަސް އަތުވެއްޖެނަމަ ފެނެއެވެ. މޫސުމާއި ބެހޭދުވަސް އަތުވެއްޖެނަމަ.... މިހެންގޮސް ލިޔާނެކަމެއްނެތެވެ. މިދާވަރުންދަންޏާ "ވޯލްޑް ޕިލޯވްފައިޓް ޑޭ- ދުނިޔޭގެ ބާލީހުން ތެޅުމުގެ ދުވަސް" ވެސް ޚުޠުބާތަކުގައި ފާހަގަކޮށްފާނެހެން އެބަހީވެއެވެ. މިބުނީ ހަމަ ޙަޤީޤަތުގައިވެސް ފާހަގަކުރާ ދުވަހެއްގެ ވާހަކައެވެ.

މިކަމަކާހުރެ މަރެއް، ކަށްވަޅެއް، ޤިޔާމަތެއް، އާޚިރަތްދުވަހެއް، ހިސާބު ބެއްލެވުމެއް، ޞިރާޠުމަގެއް، ނަރަކައެއް، ސުވަރުގެއެއްގެ ވާހަކައެއް ދައްކާނެ ވަގުތެއް ނުވެއެވެ. އަހަރުގެ ކޮންމެ ދުވަހަކީވެސް "ދުވަހެކެވެ" އެ"ދުވަސް"  އައުމުން ދައްކަން މިޖެހެނީ އެ"ދުވަހު"ގެ ވާހަކައެވެ. އެހެންކަމުން ޤިޔާމަތްދުވަހުގެ ވާހަކަދެއްކެން މިއޮތީ އެދުވަސް އައުމުން ނޫންހެއްޔެވެ؟

ޚުޠުބާއަކީ "ރޫޓިންގ" އެއްޗެކެވެ. ގިނަބަޔަކު މިސްކިތައްދަނީވެސް ޚުޠުބާ ނިމުނީއެވެ. އަދި ކުރިންދިޔަނަމަވެސް އަޑުއަހަނީ މަދުބަޔެކެވެ. ތިބެނީ މިސްކިތުން ބޭރުގަ އެމީހުންގެ "އަމިއްލަޚުޠުބާ" އެއްގައެވެ. މިއީ ވަރަށްބޮޑަށް މަނާކުރެވިފައިވާ ކަމަކަށް ވާއިރުވެސް މެއެވެ. މިސްކިތުގައި ތިބޭ ގިނަމީހުން ތިބެނީ ނިދާފައެވެ. ނުވަތަ ޣާފިލްކަންމަތީގައެވެ. މިކަންތައްތައް ބަދަލުކުރެވެނީ ޚުޠުބާތައް ބަދަލުކޮށްގެންނެވެ. ޚުޠުބާ ކިޔުން ޚުޠުބާ ދިނުމަށް ބަދަލުކޮށްގެންނެވެ. އިސްލާމީ ތާރީޚުގެ އަސަރުގަދަ ފަތްފުށްތައް އެޚުޠުބާތަކުގައި ހިމެނިގެންނެވެ. ރަސޫލު(ޞ) އާއި އެކަލޭފާނުންގެ އާލު އަޞްޙާބުންގެ ވާހަކަތަކަކީ އަސަރުން ފުރިފައިވާ ރިވެތި ވާހަކަތަކެކެވެ. ކޮންމެ ޞަހާބީ ބޭކަލަކާއި ބޭކަނބަލެއްގެ ވާހަކައަކީވެސް އަސަރުގަދަ އަދި "ޔުނީކް" ވާހަކައެކެވެ. މިފަދަ ވާހަކަތަކުގެ އެހީގައި އަޅުގަނޑުމެން އިހަށްވީ އަޅުގަނޑުމެންގެ އީމާންކަން ހަރުދަނާކުރާށެވެ. ދީނުގެ ޙުކުމްތައް އުނގެނި ދަސްކުރާށެވެ. އޭރުން އިސާހިތަކު އަޅުގަނޑުމެންގެ މެދުގައި އިސްލާމީރޫޙު އާލަވެ މުޖުތަމަޢު އަމާން ހިއްފަސޭހަތަނަކަށް ބަދަލުވެގެން ހިނގައިދާނެއެވެ. އެއަށްފަހު އަޅުގަނޑުމެންނަށް އަންހެނުންގެ ވާހަކައާއި، ކުޑަކުދިންގެ ވާހަކަ އާއި އަދި ތިމާވެށީގެ ވާހަކަވެސް ޚުޠުބާތަކުގައި ގެނެވިދާނެއެވެ. އެހެންނޫންނަމަ މިކުރެވެނީ ފޫނެއްފަޔަކަށް ފެންފުރުންކަހަލަ ކަމެކެވެ. 

ތިޔަދެވެނީ ޙައްދުފަހަނައަޅައެއްނޫންހެއްޔެވެ؟

ހައްދު ފަހަނައެޅުމޭ ބުނެވޭއިރަށް އޮޓޮމެޓިކުން އެކަން ރައްދުކުރެވެނީ ތުނބުޅި، ފަޓްލޫނުފައިކުރި، މޫނުބުރުގާ ފަދަ ދީނީ ޝިޢާރުތަކާއި ގުޅިފައިވާ ތަކެއްޗަށެވެ. އެހެންގޮތަކަށް ބުނާނަމަ ދީނަށެވެ. ދީނަށް އުޅުމަށެވެ. ގިނަފަހަރަށް އެކަންކަމަކީ ޙަޤީޤަތުގައި ދީނީ ގޮތުން ހައްދު ފަހަނައަޅައި ދިޔުމަށް ނުވާއިރުވެސް މެއެވެ. (ދީނީ ގޮތުން ޙައްދުފަހަނައަޅައި ދާމީހުން އުޅޭކަމާއި ދިވެހިންގެ ތެރޭގައިވެސް ދީނީ ގޮތުން ޙައްދު ފަހަނައެޅުމުގެ ބައެއްސިފަތައް ކޮންމެވެސް ވަރަކަށް ފެންނަމުންދިއުމަކީ އެކަށީގެންވާ ކަމެއްކަމަށް ޤަބޫލުކުރާ ޙާލު) ޙައްދު ފަހަނައެޅުމަކީ ހަމައެކަނި ދީނީ ޢަޤީދާއާއި އަޅުކަންތަކާއި ގުޅިފައިވާ ކަމެއްނޫންކަން މިޙާލަތުގައި ބަޔާންކުރަން ބޭނުމެވެ. ދިރިއުޅުމުގެ ތަފާތު ޙާލަތްތަކުގައި ތަފާތު ކަންތައްތަކުގައިވެސް ކަނޑައެޅިފައިވާ އިމުން ބޭރުވެ ދާކަމުގައިވަނީނަމަ ވާނީ ހަމަ ޙައްދު ފަހަނައަޅައިދިޔައީ ކަމުގައެވެ. އެއީ ދިރިއުޅުމަށް ކުރާ މަސައްކަތްކަމުގައިވިޔަސް، މުނިފޫހިފިލުވުމަށް ކުޅޭ ކުޅިވަރުކަމުގައިވިޔަސްމެއެވެ. ދެންއޮތީ މިންވަކިކުރާ ހިސާބު ކަނޑައެޅުމެވެ. މައްސަލަޖެހޭ، ޒުވާބުކުރަންޖެހޭ އަދި ބައެއްފަހަރު ގަޔަށް އަތްލާންޖެހޭ ހިސާބަކީވެސް މިއެވެ. އެކިމީހުން ޙައްދު ކަނޑައަޅަނީ އެކިހިސާބުގައެވެ. އެމީހެއްގެ ވިސްނުމާއި ޤަބޫލުކުރާ ޤަބޫލުކުރުމެއްގެ މައްޗަށް ބިނާކޮށެވެ. އެެހެންކަމަށްވުމާއެކު އެކެއްގެ މެދުމިން އަނެކާއަށް ޙައްދު ފަހަނައެޅުމަށް ވެދެއެވެ. އެހެންނަމަވެސް ދިރިއުޅުމުގެ ހުރިހާ ކަމެއްވެސް ދީނީ ތަރާދުން ކިރާލައިފިނަމަ  (މިދެންނެވީ ޤުރުއާނާއި ސުންނަތުގެ އަލީގައި ދިރާސާ ކޮށްލައިފިނަމަ) އެކަންކަމުގެ ޙަޤީޤީ މެދުމިނާއި ޙައްދުތައް ދެނެގަތުމަކީ އުނދަގޫކަމަކަށް ނުވާނެއެވެ. އަދި ޙައްދުތައް ކަނޑައެޅުމުގައި ތަފާތު ވިސްނުންތަކާއި ފިކުރުތަކެއްވެސް ނޫޅޭނޭމެއެވެ. 

ކޮންމެއަކަސް އަޅުގަނޑުގެ މަޤުޞަދަކީ ދިވެހި މުޖުތަމަޢުގައި އަޅުގަނޑުގެ ނަޒަރުގައި ހައްދު ފަހަނައަޅާ ގޮސްފައިވާ ކަމަކާބެހޭގޮތުން ޚިޔާލެއް ފާޅުކޮށްލުމެވެ. އެނގިވަޑައިގަންނަވާނޭ ފަދައިން (ފަހަރެއްގައި އެނގިވަޑައިގެންފައިނެތުމަކީވެސް އެކަށިގެންވާ ކަމެކެވެ.) ކުރިއަށް މިއޮތް ދެމަސްދުވަހަކީ ކުޅިވަރުގެ ވަރަށްބޮޑު ދެޢީދުގެ ދެމަހެވެ. އެއީ ހަތަރުއަހަރުން އެއްފަހަރު ބޭއްވޭ ދުނިޔޭގެ ދެ ކުޅިވަރު ޢީދެކެވެ. ޖޫންމަހު ފެށޭ ޔޫރޯ ފުޓްބޯޅަ މުބާރާތާއި ޖުލައިމަހު އޮންނަ ހޫނުމޫސުމުގެ އޮލިމްޕިކްސް އެވެ. މީގެތެރެއިން އަޅުގަނޑު މިއަދު ބޮޑަށް ވާހަކަދައްކާލަން ބޭނުންވަނީ ފުޓްބޯޅަ މުބާރާތާއި ބެހޭގޮތުންނެވެ.

ފުޓްބޯޅައަކީ ގިނަދިވެހިންގެ އެންމެ މަޤްބޫލް ކުޅިވަރެވެ. ފުޓްބޯޅަކުޅޭ އަދި ފުޓްބޯޅަ ކުޅޭތަން ބަލާ ދިވެހިންނަކީ ވަރަށް ގިނަބައެކެވެ. ޚުދު އަޅުގަނޑަކީވެސް ފުޓްބޯޅަ ކުޅުމަށާއި އެކުޅިވަރުކުޅޭ އަދިއެކުޅިވަރާއިގުޅޭ އެކިޙަރަކާތްތަކުގައިބައިވެރިވުމަށް ޝައުޤުވެރިވާ މީހަކީމެވެ. ޤަވާޢިދުން ފުޓްބޯޅަ ކުޅޭ ނަމަ ފުރިހަމަ ޞިއްޙަތެއްގައި ހުރުމަށްވެސް އެހީވެދޭނެކަން ޔަޤީނެވެ. އެހެންނަމަވެސް ދުނިޔޭގެ ފެންވަރުގައި މިބޭއްވޭ ތަފާތު ފުޓްބޯޅަ މުބާރާތްތަކާއި ގުޅިގެން ރާއްޖޭގައި މިކުރެވޭ ކަންތައްތަކާއި ހިންގޭ ޙަރަކާތްތަކަކީ ހަމަ އެކަންކަން ކުރެވެން ޖެހޭނެ ގޮތްބާވައޭ ސުވާލު އެފެދެއެވެ. މިސާލަކަށް 2010ގައި ކުޅެވުނު ވޯލްޑްކަޕް ފުޓްބޯޅަ މުބާރާތަށް ވިސްނާލަމާ ހިނގާށެވެ. 

އަޅުގަނޑުމެން އެންމެންވެސް މިކިޔަނީ އިޤުތިޞާދީ ގޮތުން ރާއްޖެ އަންދަވަޅަކަށް ވެއްޓިފައިވާ ވާހަކައެވެ. ދިވެހިންގެ އަތްމަތި ދަތިވެ ތަދުމަޑުކަން އިޙުސާސް ކުރަން ޖެހިފައިވާ ވާހަކައެވެ. އެކަމަކު ވޯލްޑްކަޕްފަދަ ފުޓްބޯޅަ މުބާރާތެއް ޕަބްލިކް ޓީވީއިން ވަގުތުން ދުރަށް ފޮނުވުމަށްޓަކައި އެތައް ލައްކަ ރުފިޔާއެއް އެބަޚަރަދުކޮށްލައެވެ. އަޅުގަނޑަށް އެނގިފައިވާ ގޮތުގައި މިފަހަރުމިބޭއްވޭ ޔޫރޯ މުބާރާތުގެ ހުރިހާމެޗެއް ޓީވީއެމްއިން ވަގުތުން ދައްކާނެއެވެ. ގައިމުވެސް ބޮޑު ޚަރަދެއް ކުރަންޖެހޭނެއެވެ. މީގެކުރިއަކުން ޔޫރޯ ގެ ހުރިހާ މެޗެއް ޕަބްލިކްޓީވީން ވަގުތުން ދައްކާފައެއްނުވެއެވެ. އެހެންވީމާ ދިވެހިންގެ އަތްމަތި ދަތިވާހަކަ އެއީ ދޮގުވާހަކައަކީ ކަންނޭނގެއެވެ. ކުޅިވަރުމުބާރާތްތައް ސްޕޮންސަރކުރަން މިހާފޯރިއެއް ހުންނައިރު ދީނީ އިޖުތިމާޢީ ޙަރަކާތެއް ހިންގުމަށް އެހީއެއްވެދޭނެ ފަރާތެއް ގިނަފަހަރަށް މިއޮންނަނީ ނުވެފައެވެ. 

ދެންމިއޮތީ މުބާރާތަށް 'ތައްޔާރުވުމުގެގޮތުން' ޓީވީން ފޮނުވާ ތަފާތު ޕްރޮގްރާމް ތަކެވެ. 2010ގައި އޮތީ ވުވްޒެލާ ފޯރިއެވެ. ވުވްޒެލާއިން ހަމައެކަނި ނުވެގެން ދެންއައީ ވުވްޒެލާކިޑްސް އެވެ. ޓީމް ތަކާއި ވަކިވަކި ކުޅުންތެރިންގެ ޕްރޮފައިލްތަކާއި ޢާއްމުންގެ ޚިޔާލާއި ފުޓްބޯޅަ 'ސްޕެޝަލިސްޓުން' ގެ ރަޢުޔުތަކާއި ފުޓްބޯޅަ 'ކޮމިއުޓިނީ' އިން މުބާރާތަށް ތައްޔާރުވުމުގެ ގޮތުން ހިންގޭ ޙަރަކާތްތަކާއި އަދި މުބާރާތަށް ޚާއްޞަކޮށް ތައްޔާރުކުރެވޭ (ދިވެހިންކިޔާ އަދި ކުޅެހަދާފައިހުންނަ) އޯޑިއޯ ވީޑިއޯ ލަވަތަކާއެކު މިކަމެއް ކުރިއަށް ދާނެއެވެ. ތަފާތު ރަށްރަށުގެ ފަރާތްތަކާއި ފޯނުން ގުޅައިގެން އެއަށްރަށުގައި ވެވެމުން ދަނީ ކޮންކަހަލަ ތައްޔާރީއެއްތޯ ބެލެމުންދާނެއެވެ. މިގޮތުން އެއްޕްރޮގްރާމެއްގައި ގުޅައިގެން ވާހަކަދެއްކި ފަރާތަކުން ޓީވީއެމްއިން މާބޮޑަށް 'އޯވަރ' ވެގެން އުޅޭ ވާހަކަ ބުންޏެވެ. އަދި އޭނާއާއި ކުރެވުނު ބައެއް ސުވާލުތަކަށް ހެއްވާ ޖަވާބުތަކެއް ދިނެވެ. ކޮންމެއަކަސް އެޒުވާނާ ބުނީ ވަރަށް ބޮޑުތެދެއްކަމަށް އަޅުގަނޑުޤަބޫލުކުރަމެވެ. ރާއްޖޭގައި މިފަދަމުބާރާތެއް ބޭއްވުމަކީ އެކަށިގެންވާ ކަމެއްނޫނެވެ. އަދި ރާއްޖެ މިފަދަމުބާރާތަކަށް ކައިރި ޒަމާނަކު ކޮލިފައިވުމަކީވެސް އެކަށިގެންވާ ކަމެއްނޫނެވެ. އެކަމަކު މިވެރިން އުޅޭގޮތުން ހީވަނީ މުބާރާތް އޮތީ ރާއްޖޭގައި ހެންނެވެ. ނުވަތަ ރާއްޖޭ މިމުބާރާތަށް ކޮލިފައިވެ މުބާރާތުގައި ވާދަކުރަނީހެންނެވެ. ޢަޖައިބުވެ އަންތަރީސް ވާހާވެއެވެ. ތަފާތު ޤައުމުތަކަށް އަދި ތަފާތު ކުޅުންތެރިންނަށް ސަޕޯޓްކުރާ ފަރާތްތަކުން އެމީހުންގެ ޙަރަކާތްތައް ކުރިއަށްގެންދަން ހޭބޯނާރާ އުޅެތެވެ. މިއިރު އެޤައުމުތަކަށް ނުވަތަ އެކުޅުންތެރިންނަށް މިއީ ދުނިޔޭގައި އުޅޭ ބައެއްކަންވެސް އެނގޭނެގޮތެއް ނެތެވެ. މުބާރާތް ބެލުމަށްޓަކައި ޖަގަހަތައް ތައްޔާރުކުރެވި ޒީނަތްތެރި ކުރެވެމުންދެއެވެ. މުބާރާތުގައި ބައިވެރިވާ ބައެއްޤައުމުތަކުގެ ދިދައިގައި ޞަލީބު ކުރެހިފައިހުރުމާއެކު މިދުވަސްވަރަކީ ގޭގޭގެއާއި މަގުމަތީ ފާރުތަކުން ޞަލީބުވެސް ފެންނަދުވަސްވަރެކެވެ. މުބާރާތާއި ގުޅޭ ފޮތްތަކާއި 'ސްކޯރޝީޓާއި ވޯލްޗާޓް' ފަދަ ތަކެތި ޢާއްމުވެގެންދެއެވެ. ގޭގޭގެ ސިޓިންގްރޫމްތަކުގެ ފާރުތަކުގައި މިތަކެތި ހަރުކުރެވި މުބާރާތް ހިނގަމުންދާއިރު 'އަޕްޓޭޑް' ކުރެވެމުންދެއެވެ. އެމީހަކު ސަޕޯޓްކުރާޓީމެއް ކަޓަންދެންނެވެ. ދެން އެހިސާބުން އޭގެމަތިން ހަނދާންނެތިގެންދެއެވެ. 

މުބާރާތް ފެށުމާއެކު މެޗްކުޅޭ ވަގުތާއި ޕްރީމެޗްޝޯތަކާއި ޕޯސްޓްމެޗް ޝޯތަކުން ޓީވީ ޕްރޮގްރާމް ގައިޑް ފުރާލައެވެ. ހަވީރު ހަތަރުގަޑިބައިގައި މެޗްފެށެން އޮތަސް އޭގެ ގަޑި ދޮޅުގަޑިއިރުކުރިން ލައިވްޝޯވ ފަށައެވެ. އަސުރު ނަމާދަށް ބަންގިއަށް މެދު ކަނޑާލާފައި ބަންގި ހަމަނިމުމާއެކު އަނެއްކާފަށައެވެ. އޭރު އަދި މެޗްފެށޭނެ އިރެއްވެސް ނޭނގެއެވެ. އެކަމަކު ޝޯވްހުށައަޅަންތިބޭ ފިރިހެން 'އެންކަރު' ތައް ޖަމާޢަތުގެ ނަމާދު އަޅާފައި އެއަށްވުރެ ބޮޑު އެހެންކަމެއް ނުވާ ބީދައަކުން އެޝޯވ އާގެން ކުރިއަށް ދެއެވެ. މައްސަރުކަންތަކާހުރެ އަޅާނުލާތިބީއޭ ހީކޮށްލެވޭނީވެސް އަންހެން 'އެންކަރު' ތަކެއް ނަމަތާއެވެ. އަޅެ ނަމާދުކޮށްލައިގެން އައިސް އަނެއްކާ ކުރިއަށް ގެންދިޔަނަމައީ ކީއްހެއްޔެވެ؟ ފަހަރެއްގައި އެއީ ސްޕޮންސަރުންގެ އިރުޝާދުކަމަށް ވުމަކީވެސް އެކަށީގެންވާ ކަމެކެވެ. އެކަމަކު ތިޔަ ސްޕޮންސަރުންނަކަށްވެސް ތިބާއަށް އެންމެފަހުވަގުތު ވެދެވޭނެ އެއްވެސް އެހީއެއްނޯންނާނެއެވެ. 

އެސްއެމްއެސް ކޮށްގެން ސްކޯރދިމާކުރުމާއިި މޮޅުވާނެޓީމެއް ބުނުންފަދަ ޙަރަކާތްތައް މިދުވަސްވަރު ވަރަށްގަދައަށް ކުރިއަށްދެއެވެ. އަދި ރަނގަޅުޖަވާބު ދިމާކުރާފަރާތްތަކުގެ މެދުގައި ގުރުއަތުލައިގެން އަގުބޮޑެތި އިނާމްތައް ދެވެއެވެ. މިއަށް ޖުވާއޭ ނުކިޔޭނެނަމަ ދެން ޖުވާއޭ ކިޔޭނެ އެހެން އެއްޗެއް ވާނެކަމަށް އަޅުގަނޑަށް ޤަބޫލުކުރަން ދައްޗެވެ. މެޗްތައް ޤަވާޢިދުން ވަގުތުން ބަލާފަރާތްތަކަށް ޖަމާޢަތުގެ ނަމާދަށް ޙާޟިރުވުމާއި ފަތިސް ނަމާދު ވަގުތުގައި ކުރުމަކީ ވަރަށް ދަތިކަމަކަށް ވާނެއެވެ. އަމުދުން އިރުއޮއްސޭ ވަގުތު މެޗްކުޅެވޭތީ  މަޣުރިބުނަމާދު އަޅާފައި ވަރަށް ގިނަބަޔަކު ޓީވީބުޑުގައި ތިބޭތަން ފެނެއެވެ. ކޮންމެއަކަސް ދިވެހިޓީވީން ވޯލްޑްކަޕް ވަގުތުން ދައްކަން ފެށުމަށްފަހު ކޮންމެ ފަހަރަކުހެން ދިވެހިންގެ ޙާލަތު ހުންނަނީ މިފަދައަކުންނެވެ. 

މިއަހަރު ޔޫރޯގެ ހުރިހާ މެޗެއް  ވަގުތުން ދައްކާ ގޮތަށްވަނީ ހަމަޖެހިފައެވެ. ވޯލްޑްކަޕްހާ ފޯރިގަދަނުވިޔަސް މިއީވެސް ދިވެހިންގެ މެދުގައި ވަރަށް މަޤުބޫލު މުބާރާތެކެވެ. އެހެންކަމުން ހީކުރެވެނީ މީގެ ކުރިއެކޭ އެއްގޮތަށް މުބާރާތާއި ގުޅޭ ޙަރަކާތްތައް އެފަދަގޮތަކަށް ދާނޭކަމެވެ. އެހެންނަމަވެސް އެކަމުގައި މެދުމިނުގެ އުސޫލެއް ގެންގުޅުމަކީ އެންމެ ރަނގަޅުގޮތްކަމުގައި އަޅުގަނޑުދެކެމެވެ. އަޅުގަނޑުމެންގެ ދީނުގައި މުނިފޫހިފިލުވުމަކީ ނެތްކަމެއްނޫނެވެ. ފުޓްބޯޅައާއި ގުޅޭ ޙަރަކާތްތަކުގައި އަޅުގަނޑުމެންނަށް ބައިވެރިވެވިދާނެއެވެ. އެކަމަކު އަޅުގަނޑުމެންގެ ދީނީ އުސޫލުތަކާއި ވާޖިބުތަކަށް ހުރަސްއެޅިގެންދާނެފަދަގޮތަކަށް އެކަންކަމުގައި ހޭބޯނާރާ އުޅުމަކީ ކަމުދާގޮތެއްނޫނެވެ. މެޗްގެ ސްކޯރދިމާކުރުމަށް އެސްއެމްއެސް ކޮށް އިންޓަރނެޓްކްއިޒްތަކުގައި ބައިވެރިވެ، ބޮޑުޚަރަދުކޮށްގެން ޓީވީއާއި ޕްރޮޖެކްޓަރާއި އެނޫންވެސް އެފަދަ އާލާތްތައް ގަނެ ޖަގަހަތައް ހަދައި ރޭނގަޑު ދަންވަރު ހޭލާތިބެ ޕްރީމެޗްޝޯވތަކާއި މެޗްތަށް ބަލާފައި ފަތިސްނަމާދު ވަގުތު ގާތްވުމުން އަރާއޮށޯވެ ނިދުމަކީ ފުޓްބޯޅައިގައި ހައްދުފަހަނައަޅައިދިއުން ނޫންކަމުގައި އަޅުގަނޑު ނުދެކެމެވެ.

ތިޔަކަނބަލުންގެ އަގަކީ އެއީހެއްޔެވެ؟؟؟؟



އަންހެންކުއްޖާ އިނީ ދިގުގޮނޑިއެއްގެ އެއްކޮޅުގައި ފޮތެއްކިޔާށެވެ. އެވަގުތު އެތަނަށް އައި ފިރިހެނަކު އެގޮނޑީގެ އަނެއްކޮޅުގައި އިށީނެވެ. އެވަގުތު އެއަންހެއްކުއްޖާ އެފިރިހެންމީހާއާއި ދިމާލަށް ނުރުހުމުގެ ފާޑަކަށް ބަލައިލައިފައި އަދިވެސް ދުރަށް ޖެހިލިއެވެ. ގޮނޑީގައި އިށީނުމަށްފަހު ފިރިހެންމީހާ ނެގީ ޗޮކްލެޓެކެވެ. ދެންފެނުނީ ފެއަށް ޖެހިލި އަންހެންކުއްޖާ އެފިރިހެންމީހާގެ ގައިގައި ތަތްވެފައި އިންދައެވެ. އޭރުވެސް ޗޮކްލެޓްކަމުންދިޔައީ ފިރިހެންމީހާއެވެ.

އަންހެންކުއްޖަކު ލެޕްޓޮޕެއްގެ އެހީގައި އިންޓަރނެޓަށް ވަނުމަށް މަސައްކަތްކުރަނީއެވެ. އެވަގުތު އެތަނަށް އައި ފިރިހެންމީހާއާއި ދިމާލަށް އޭނާ ބަލައިލީ ނުރުހުމުގެ ނަޒަރަކުންނެވެ. ދެން އަންހެންކުއްޖާގެ މޫނުމަތިން ފެނުނީ މާޔޫސީކަމެވެ. އެފިރިހެންމީހާވީކީއްތޯ އަހާލުމުން އެނގުނީ އިންޓަރނެޓް މޯޑެމްގައި ލާރިނެތްކަމެވެ. ދެން އެފިރިހެންމީހާ 100ރުފިޔާ އަތުންއަތަށް ފޮނުވާލައެވެ. އަންހެންކުއްޖާ އުފަލުން ހިނިތުންވެލައެވެ. ދެންދެމީހުން އެކުގައި ސަމާސާ ކުރަމުން ނެޓްގެތެރެއަށް ވަދެއެވެ.

ރެސްޓޯރެންޓެއްގެ ތެރޭގައި ހުރި 3 މޭޒުދޮށުގައި ތިންގުރޫޕް ތިބެއެވެ. އެއްމޭޒުދޮށުގައި ވަރަށް ޒަމާނީ ދެޒުވާނުންތިބެއެވެ. އަނެއްމޭޒުދޮށުގައި ތިބެނީ މުސްކުޅިފެޝަނުގެ ދެޒުވާނުންނެވެ. ތިންވަނަމޭޒުދޮށުގައި ޒުވާންއަންހެންކުދިންތަކެއް ތިބެގެން މިމުސްކުޅިފެޝަނުގެ ކުދިންގެ ކަންތައްތަކަށް ޖޯކްޖަހާ ހީނހަދަމުން ދިޔައެވެ. ދެންފެނިގެންދިޔައީ ފިރިހެންކުދިންގެ މޭޒުތަކަށް ޕިއްޒާ ގެންދެވުނުތަނެވެ. ޒަމާނީ ކުދިންގެ ޕިއްޒާއަށްވުރެ މުސްކުޅިފެޝަނުގެ ކުދިންގެ ޕިއްޒާ މާބޮޑެވެ. އެވަގުތު އެއަންހެންކުދިންތައް އެކުދިންތިބިތަނުން ތެދުވެގެން އައިސް ބޮޑުޕިއްޒާ އޮތް މޭޒުދޮށުގައި ޖައްސާލިއެވެ. މިކަމާ ޒަމާނީ ކުދިން ކަޑަވެފައި ތިބިއިރު މުސްކުޅިފެޝަނުގެ ކުދިންތިބީ ހިނިއައިސްފައެވެ.

މަތީގައި އަޅުގަނޑު ސިފަކޮށްފައިވާ ތިން މަންޒަރުވެސް ތިޔައިގެތެރެއިން ގިނަބޭފުޅުންނަށް ފެނިވަޑައިގެންފައިވާނެކަމަށް ހީކުރަމެވެ. އެތިން މަންޒަރަކީވެސް ދިވެހި ޓީވީ ޗެނަލަކުން ގިނަދުވަސްތަކެއް ވަންދެން ދެއްކި ތިން އިސްތިހާރެވެ. މިހާރުދައްކާކަމެއް ނޭނގެއެވެ. މިއިސްތިހާރުތައް ބޭނުންކުރެވިފައިމިވަނީ ކޮންމެވެސް ވިޔަފާރިއެއް/ ޚިދުމަތެއް ކުރިއެރުވުމަށްޓަކައެވެ. އެއިސްތިހާރުތައް ފެންނަމީހުންނަށް އެނގެންވީ އެއިސްތިހާރުކުރެވޭ ޚިދުމަތްތަކާއި ތަކެތީގެ މޮޅުކަމެވެ. ރަނގަޅުކަމެވެ. ބޭނުންތެރިކަމެވެ. އެހެންކަމަށްވިޔަސް އަޅުގަނޑަށް މިއިސްތިހާރުތަށް ފެނުމުން އެނގުނީ އެހެންކަމެކެވެ. އެއީ މުޖުތަމަޢުގައި އަންހެނުންގެ އަގުދަށްކަމެވެ. ނިކަމެތިކަމެވެ. ބަލިކަށިކަމެވެ. އެކަންކަން އަންގައިދޭން އަންހެނުން ފޫގަޅާފައި ނިކުމެތިބިތިބުން ރަމްޒުކޮށްދިނީ އެމީހުންގެ ވިސްނުމާއި ފިކުރުންވެސް އެކަމަށް އެއްބަސްވާކަމެވެ.

އިސްތިހާރަކުންނަމަވެސް ނުވަތަ އެނޫންގޮތަކުންނަމަވެސް ހިލޭ ފިރިހެނަކާއި އަންހެނަކު މައްލަވަކުރުމާއި ބީހިއުޅުމަކީ ދީނީގޮތުން ކުޑަކޮށްވެސް ރޯފިލާފައިވާ މީހަކަށް ކިހާވަރެއްގެ ކަމެއްކަން އޮޅިފައެއްނޯންނާނެއެވެ. އެހެންނަމަވެސް އެވާހަކަ އެހަށް ބާއްވާފައި މިވާހަކަ ދައްކަމާ ހިނގާށެވެ.

ޗޮކްލެޓަކަށްޓަކައި، ހިލޭ ފިރިހެނެއްގެ ގައިގައި އައްޓަމަހެއްހެން ތަތްވެގަންނަ އަންހެނެއްގެ އަގާއި ޢިއްޒަތާއި ކަރާމަތާއި ޝަރަފު ވަނީ ކިހާހިސާބެއްގައި ކަން އަޅުގަނޑަކަށް ބުނެދޭކަށް ނޭނގެއެވެ. އަޅުގަނޑަށް ގަބޫލުކުރެވޭގޮތުގައި އެއީވެސް 'ހަށިވިއްކުމެވެ'. އޭނާގެ ހަށިގަނޑާއި އެހަށިގަނޑުގެ ހޫނުކަން ހިލޭފިރިހެނަކަށް އިޙުސާސްކޮށްދިނުމަކީ އެފިރިހެނަކަށް ލިބޭނެ ލައްޒަތަކަށް ހަމަގައިމުވެސް ނުވެއެއްނުދާނެއެވެ. އެކަމުގެ އަގަކަށް މިވަނީ ޗޮކެލެޓެކެވެ. ނުވަތަ އޭގެން އެތިކޮޅެކެވެ. އަނެކަކަށް ދެވުނީ 100ރުފިޔާއެވެ. ހަމަދެވުމާއެކު އެމީހާމިވީ ތިމާއާއި ބޭނުންވަރަކަށް މައްލަވަކޮށް ސަމާސާ ކުރެވޭ ފަދަމީހަކަށެވެ. އެކަމަކު އޭގެކުރިން އެއީ ނުދަންނަ ބީރައްޓެއްސެކެވެ. ދެން ބޮޑުޕިއްޒާ ފެނުުމުން އެދިމާއަށް ދުއްވައިގަންނަނީ ދަޢުވަތެއް ލިބިގެނެއްވެސް ނޫނެވެ. އެކަމަކުވެސް އެއަންހެންކުދިންނަކަށް އަދި ޕިއްޒާއަށް އޯޑަރުދިން ފިރިހެންކުދިންނަކަށްވެސް އެއީ މައްސަލައެއްނޫނެވެ. ޕިއްޒާ ކެއުމުގެ އަގަކީ އެއްމޭޒުދޮށެއްގައި ތިބެގެން ހީނސަމާސާކޮށްހެދުން އެކަނިކަމަށްވީ ނަމަވެސް އަންހެންކުދިންގެ ޖިސްމުތަކުން އެއޮތީ ޕިއްޒާކެއުމުގެ އަގު އަދާކުރެވިފައެވެ.  

މިމަންޒަރުތަކުން ސިފަކޮށްދެނީ މުޖުތަމަޢުގެ ޙަޤީޤީ ސޫރަކަމުގައިވާނަމަ ހިތާމައިގެ ކޮޅެއްވެސް ނެތެވެ. ހިތާމަ މައްޗަށް ހިތާމަ ކުރަންމިޖެހެނީ މިފަދަ ބޭއަދަބީ ދަށްފެންވަރުގެ އިސްތިހާރުތަށް ކުޅެ ދުރަށް ދައްކަމުން މިގެންދަނީ މުސްލިމުންގެ ގައުމެއްގައި މުސްލިމުން ކަމަށް ވާތީއެވެ. އަދި މުސްލިމް ގައުމެއްގެދައުލަތުގެ ޓީވީ އިން ކަމަށް ވާތީއެވެ. މިފަދަ އިސްތިހާރުތައް ކުޅެ އާއްމުކުރުމަކީ ލިބޭ ފަޚުރެއްކަމަށް މިގައުމުގެ މުސްލިމް އަންހެންދަރިން ދެކޭތީއެވެ.

ވިޔަފާރިވެރިންނާއި ކުންފުނިތަކުން އަންހެންކުދިންގެ ހަށިތަށް އެމީހުންގެ ވިޔަފާރިކުރިއެރުވުމަށް ބޭނުންކުރާކަން އެއީ އަންހެނުން ނިކަމެތިކުރެވިފައިވާ މިންވަރު ވަރަށް ރަނގަޅަށް ދައްކައިދޭ ހެއްކެކެވެ. މިދެންނެވުނު އިސްތިހާރުތަކާއި އަދި މިނޫންވެސް އިސްތިހާރުތަކުގައި އަންހެންކުދިންގެ ޖިސްމުތައް ބޭނުންކުރެވެއެވެ. އެކަންކުރެވެނީ ހަމައެކަނި ހެދުމާއި ފައިވާނާއި ގަހަނާ އިސްތިހާރުކުރާކަށް ނޫނެވެ. އަދި ކީއްހެއްޔެވެ؟ ކޮންމެ ފަދަ ވިޔަފާރިއެއްގައި ކޮންމެފަދަ އާލާތެއް އިސްތިހާރުކުރަންވިޔަސް އަންހެންކުދިންގެ ހަށިތައް ބޭނުންކުރެވެއެވެ. އެއީ ވަޑާމުގެ ސާމާނުކަމަށްވިޔަސް، ގެދޮރު ޢިމާރާތްކުރުމަށް ބޭނުންކުރާ ތަކެތިކަމުގައިވިޔަސް އަދި އިންޖީނަށް އަޅާ ތެޔޮކަމުގައިވިޔަސް ކަންހުރީ މިފަދައަކުންނެވެ.

އިސްތިހާރުތަކުގައި އަންހެންކުދިން ބޭނުންކުރުމުން އަމައެކަނި ނިމުނީއެއްނޫނެވެ. އިސްތިހާރުތަކުގައި ބޭނުންކުރެވޭ އަންހެންކުދިންގެ ހަށިގަނޑު ވީހާވެސް ބޮޑަކަށް ހާމަކުރުމަށްވެސް ސަމާލުކަންދެވެއެވެ. ބައެއް އިސްތިހާރުން ފެންނަ އަންހެންކުދިންގެ އޮރިޔާންކަން ބޮޑުކަމުން އެއީ ދިވެހި އަންހެންކުދިންނަކަށް ނުވާނެޔޭ ހީވާ ފަހަރުވެސް އާދެއެވެ. އެހެންނަމަވެސް ހިތާމައަކީ އެއީ ދިވެހި އަންހެންކުދިންނަށް ވާކަމެވެ. އަދި އެމަންޒަރުތައް ދިވެހި ސިޓިންގރޫމް ތަކުގެ ޓީވީތަކަށް ވާޞިލުވާކަމެވެ. ދިވެހި ޢާއިލާތަކުގެ ކުރިމަތީގައި ހާމަކުރެވޭކަމެވެ.

އޭ މިގައުމުގެ ލޮބުވެތި އަންހެންދަރިންނޭވެ. ތިޔަކަނބަލުންނަށް ﷲ ދެއްވާފައިވާ ފުރިހަމަ ޖިސްމުތަކާއި ސިފަތަކުގެ އަގަކީ އެއްއިރު ކާލުމުން ބޭރުކަރުދާސްގަނޑު ފިޔަވައި އިތުރުއެއްޗެއްނޯންނަ ޗޮކްލެޓަކީ ހެއްޔެވެ؟ ނުވަތަ ޕިއްޒާއަކީ ހެއްޔެވެ؟ ނުވަތަ ފައިސާކޮޅަކީ ހެއްޔެވެ؟ އަގުބޮޑުތަކެއްޗަކީ ލޮލަށް ތަދު ފަސޭހައިން އަތްނުލެވޭ ތަކެތިކަން އެނގިނުލައްވާތޯއެވެ؟ އަގުބޮޑެތި ޖަވާހިރާއި މުތީތަށް މަގުމަތީގައި އުކާލެވިފައި ބޭނުން މީހަކު އައިސް ނަގާ ކުޅެހަދާން ހުރޭތޯއެވެ؟ ތިޔަކަނބަލުންނަކީ ދީނުގައި ޤަދަރާއި ޝަރާފަތާއި މާތްކަން ދެވިފައިވާބައެކެވެ. އެކަން ތިކަނބަލުން ނުދަންނަނަމަ ދެން ދަންނާނީ ކޮންބައެއްތޯއެވެ؟

ނިންމާލަމުން މުޅިން ތަފާތުވާހަކައެއް ދަންނަވާލާނަމެވެ. އެއީ ދާދިފަހުން ފެނުން އިސްތިހާރެއްގެ ވާހަކައެވެ. ބަންގިގޮވަމުން ދިޔަވަގުތު މީހަކު ބޫޓަށް އަރައިގެން ކުޅެން(ނުވަތަ ދުވަން) ނިކުންނަނީ އެވެ. ނަމާދުނުކޮށް ދާތީ އެކަން ހަނދުމަކޮށްދިނުމުން ފަހުން ކުރާނަމޭ ބުނެފައެވެ. އެހެންމީހަކާއެކު ސައިކަލެއްގައި ކުޅޭތަނަށްދެވުމާއެކު ސައިކަލުން ފައިބައިގެން މަގުހުރަސްކުރަން ހިނގައިގަނެވެ. ދެންފެންނަނީ ދުއްވާ އެއްޗެއްގައި ޖެހި މީހާ ވިއްސައިގެން ދާތަނެވެ. މިއިސްތިހާރުން އަންގައިދެނީ ކޮންމެ ވަގުތަކުވެސް މަރު ވެދާނެކަމެވެ. ކޮންމެއަކަސް އިސްތިހާރުނިމިމުން އަޅުގަނޑަށް އިނދެވުނީ ބަސްހުއްޓިފައެވެ. އެއީ މުޅިން އަލަށް މިފަދަ މެސެޖެއް އިސްތިހާރެއްގެ ސިފައިގައި ދިވެހި ޓީވީއަކުން އަޅުގަނޑަށް ފެނުނީމައެވެ. ހިތާމައާއި އުފާ އެކުއެކުގައި އިޙުސާސްކުރެވެމުން ދިޔައެވެ. ހިތާމައަކީ ވޭތުވެ ދިޔަ ދިގު މާޒީގައި މިފަދަ އިސްތިހާރެއް ފެނިފައި ނުވާތީއެވެ. އުފާވީ އަލަށް ނަމަވެސް މިފަދަ މަންޒަރެއް ފެނުނީތީއެވެ. މާތްﷲ، އެއިސްތިހާރު ހަދާ ދުރަށްފޮނުވުމުގައި ބައިވެރިވި ހުރިހާ ފަރާތްތަކަށް ރަޙުމަތްލައްވާ ފާފަފުއްސަވާށިއެވެ. އަދި އޭގެ ސަބަބުން ގިނަބަޔަކަށް ފައިދާވާނެގޮތް މެދުވެރިކުރަށްވާށިއެވެ. އާމީން.

The Virtue of Remembering Allaah

By: Allaam Naym

Let’s face it. Everybody ― that includes me too ― remembers Allaah most when a great calamity befalls them. Orwhen we need to pass our exams, or when we need to be saved from situation of utmost embarrassment. This is not a problem, however. In fact, what I just talked about is what we should do and continue doing so.


The problem is something else: Not remembering Him at other times. In not doing so, you and I both are losing on a hefty deal of reward which is otherwise so easily gained. You just might grasp how great this loss is if you reflect upon all the free time wasted on doing virtually nothing or even thinking about what to do.


The Virtue of Remembering Allaah


Verily, in the remembrance ofAllâh do hearts find rest. [the Holy Qur’aan, 13:28].


This great verse of the Qur’aan provides the cure of one of the most notorious diseases we see today, namely depression. Is not the resting of the hearts the precise definition of the cureof depression? If one remembers Allaah, in the right way it should be done,constantly and frequently, one will never get depressed, no matter how great acalamity befalls them in this world.


The renowned Islamic Scholaral-Allaamah Ibn al-Qayyim described remembrance of Allaah as a paradise of thisworld and he (may Allaah have Mercy on him) said that he heard his teacher Shaikh al-Islam Ibn Taymiyyah say: ‘Indeed, there is a paradise in this world’ [‘al-Wãbilas-Sayyib’ (p.44)]. Ibn al-Qayyim continued, saying that some people of the knowledge would say that if the kings and their sons knew what they were experiencing, they would have fought them with swords over it [‘al-Wãbilas-Sayyib’ (p.44)].


If one remembers Allaah, Allaah Himself will remember him,  for Allaah says in the Quraan: فَاذْكُرُونِيأَذْكُرْكُمْ وَاشْكُرُوا لِي وَلَا تَكْفُرُونِ[Translation of the meaning: Therefore remember Me (by praying,glorifying). I will remember you, and be grateful to Me (for My countlessFavours on you) and never be ungrateful to Me] [2:152]


Allaah says about this remembrance of you by Him in Chapter 29 of the Holy Qur’aan: and the remembering (praising) of (you by) Allâh (in front of the angels) is greater indeed [than your remembering (praising) of Allâh in prayers] [29:45]


You will be rewarded for remembering Allaah in the Hereafter as well as in this world. And the part where you will be rewarded in this world will be not be delayed i.e. it will be rewarded the same time you do the action. I myself have experienced it.


Al-Haafiz Ibn Hajar (mayAllaah have mercy on him) said commenting on a hadheeth [narrated by Imamal-Bukhari] that the meaning of remembering Allaah (in that hadheeth) is to constantly pronounce the words that are encouraged to be said. He continued to say that it(i.e. remembrance of Allaah) also includes doing the actions that Allaah has made obligatory or supererogatory, and that it can sometime occur [only] with the tongue without even having to know the meaning of the words one is saying[provided that one does not mean anything other than what it means]. He elaborated on this by saying that if one adds to this pronouncement the presence of his heart (i.e. this means to be conscious of what he is uttering,even if he does not know the meaning), then it is better. Likewise, if he adds the understanding of what the dhikr means to it, then it is even better [see‘Fath al-Bãrî (11/212)].


Even if we might not be able to remember Allaah that frequently, let’s all make it a habit to set asidea specific time (start short!) for the remembrance of Allaah, and insha Allaah, as we realize the benefits of it, we will start doing it more often.


May Allaah bless us with the ability to remember Him constantly and forgive us our sins.

އަންހެނެއްވިއްޔާ ހަންގަޑެވެ. - 'ޕިއްލޭ' މެން އަންހެނުންނަށް ހޯދައިދޭ ކަރާމަތާއި ޝަރާފަތުގެ ތެރެއިން

މިއަދު އަޅުގަނޑުމެންގެތެރެއަށް ފެތުރިގެންމިދިޔައީ ކޮންމެވެސް ޕިއްލޭއެއްގެ އަޑެކެވެ. މިވާގޮތަކީ ދިވެހި ރާއްޖޭގައި އަންހެނުންގެ ޝަރާފަތާއި ކަރާމާތް ނިގުޅައިގެނެވެނީޔޯއެވެ. އެކަނބަލުންނަށް އިހާނެތިކޮށް ހިތެވެނީ ޔޯއެވެ. ލަދުވެތިކަމާއި ޝަރާފަތާއި ކަރާމާތުން އެއްކިބާވެ ޒިނޭގެ ލަދުޙަޔާތެއްނެތް ޢަމަލުހިންގުމުގެ ސަބަބުން ޙައްދުޖެހުން ޤާއިމްކުރުމަކީ ޒަމާނީޑިމޮކްރަސީގެ 'މަތިވެރި' އުސޫލުތަކާއި އަންހެނުންގެ ޢިއްޒަތާއި ފުށުއަރާކަމަކަށް ވަނީޔޯއެވެ. އަދި މިކަމާމެދު ދިވެހިން ބަހުސަކަށް ދާންވީއްޔޯއެވެ؟ އަދި މިނޫނަސް އަޅުގަނޑުމެންގެ މާތް އިސްލާމްދީނުގެ މަތިވެރި އުޞޫލުތަކަށް ހަޖޫޖެހުމުގެ ގޮތުން އިތުރުވާހަކަތައް މިކަނބުލޭގެ ދެއްކިމެއެވެ.

ކޮންމެއަކަސް މިކަނބުލޭގެ މިވާހަކަދައްކާ ނިމުމާއެކު ދިވެހިންގެ  "ޢިއްޒަތްތެރިން" އަތްތިލަބަޑިޖައްސަވާ އެކަކަށްވުރެ އަނެކަކު ކުރިން މިކަނބުލޭގެއާއި އަތާއި އަތްޖޯޑުކޮށް ސަލާންކުރުމަށްޓަކައި ތެޅިގަތްތަން ދުށީމެވެ. އެކަމަކު ޢިއްޒަތްތެރިކަންވަނީ ﷲއަށާއި އެކަލާނގެ ރަސޫލާ ޞައްލަﷲ ޢަލައިހިވަސައްލަމް އަށާއި މުއުމިނުންނަށްކަން އަހަރުމެންދަންނަމުއެވެ.

ކޮންމެއަކަސް މިހާސަރުތައްދެމި މިކަނބުލޭގެއަކީ އ.ދ ގެ އިންސާނީ ޙައްޤުތަކާއި ބެހޭ އެމްބެސެޑަރެކެވެ. މި އ.ދ ނުވަތަ ޔޫއެން އަކީ ޑިމޮކްރަސީގެ އައްޕައެވެ. އެކަމަކު ޑިމޮކްރަސީ އެންމެބޮޑަށް ފޫގޮސްފައި އޮންނަނީވެސް މިތަނުގައެވެ. އެއީ ޑިމޮކްރަސީ އަކީ ގިނަމީހުން ބޭނުންވާ ގޮތްކަމަށްވާއިރު  އ.ދ ގެ އެހެންހުރިހާ މެމްބަރުން އެއްކޮޅަށް ޖެހުނަސް  އެމެރިކާ، ނުވަތަ ރަޝިޔާ ނުވަތަ ޗައިނާ ނުވަތަ ފުރާންސް ނުވަތަ ޔޫކޭ އިދިކޮޅުހަދައިފިނަމަ އެކަމެއް އެހާހިސާބުން ނިމުނީއެވެ. ވީޓޯކުރުމުގެ ބާރުލިބިފައިވާ މިފަސްޤައުމަކީ އ.ދ.ގެ ދާއިމީ ފަސްމެމްބަރުންނެވެ. މިގުރޫޕުން ޖާގަލިބޭތޯ އިންޑިޔާއާއި ޖަޕާނުފަދަ ޤައުމުތަކުން ހޭބޯނާރާ މިހާރުވެސް މަސައްކަތްކުރަނީއެވެ. މިއީ އ.ދ ގެ ޑިމޮކަރަސީގެ ޙާލަތެވެ. ކޮންމެއަކަސް މައުޟޫޢު އަށް އެނބުރި ދަމާ ހިނގާށެވެ.

ކޮންމެއަކަސް މިކަނބުލޭގެ މިފާޅުކުރި ޚިޔާލަކީ ދިވެހިންގެ ތެރެއަށް އަލަށް އައިސްގެން އުޅޭ ޚިޔާލެއްނޫނެވެ. މިއީ މީގެ ކުރިން ބައެއް ދިވެހި ވެބްސައިޓްތަކާއި ފޯރަމްތަކުގައި ބައެއްދިވެހިން ފާޅުކޮށްފައިވާ ޚިޔާލެކެވެ. އަދި ކީރިތި ޤުރުއާނާއި ސުންނަތުން ސާބިތުވާ ކަންތައްތަކުގައިވެސް ޚިޔާލުހޯދުމުގެ ޕޯލްތައް ބައެއް މަޝްހޫރުދިވެހިވެބްސައިޓްތަކުން ފެނެއެވެ. މިގޮތުން ރާއްޖޭގެ އެންމެ މަޝްހޫރު އެއް ނިވުސް އޮންލައިން ގައި އަންހެނުން ޤާޟީކަމަށް އިސްކުރަންފެނޭތޯ ނުވަތަ ނުފެނޭތޯ ބަލަން ހުޅުވާލި ޕޯލްއެއް އަޅުގަނޑުދުށީމެވެ. މިހާރުވެސް އެސައިޓްގެ އާކައިވްއިން މިފެންނަންހުރުމަކީ އެކަށީގެންވާ ކަމެކެވެ. ކޮންމެއަކަސް މިފަދަ ޚިޔާލެއް މިހާފާޅުކަން ބޮޑުގޮތެއްގައި އަދި ރާއްޖޭގެ ޤާނޫނުތައް ހަދާ މަޖުލީހުގައި ފާޅުކުރެވުނު މިއީ ފުރަތަމަފަހަރު ކަންނޭނގެއެވެ. ކޮންމެއަކަސް މިކަނބުލޭގެ މިކަމެއްމިކުރީ ދިވެހިންގެ ބައެއްގެ 'ބެކަޕް' ލިބިގެން ކަމާއިމެދު އަޅުގަނޑުކުޑަކޮށްވެސް ޝައްކެއްވެސް ނުކުރަމެވެ.

މާފުކުރަށްވާށެވެ. ލިޔުމުގެ ސުރުޚީގައި އެހިމެނޭ ޢިބާރާތާއި ހަމައަށް އަދިވެސް މިއުޅެނީ ނުދެވިގެންނެވެ. އަޅުގަނޑު ދަންނަވަން މިއުޅެނީ ހުޅަނގުގެ ޤައުމުތަކުން އަންހެނުންނަށް ހޯދައިދޭ ޢިއްޒަތާއި ޝަރަފާއި ކަރާމާތުގެ 'ފުރިހަމަ' ކަމުގެ ވާހަކައެވެ. އެމީހުން އެދަޢުވާކުރާ އަންހެނުންނާއި ފިރިހެނުންގެ 'ހަމަހަމަ' ކަމުގެވާހަކައެވެ. އަޅުގަނޑު ގަބޫލުކުރާގޮތުގައި އެމީހުން އެހޯދައިދޭ ޢިއްޒަތާއި ޝަރަފާއި ހަމަހަމަކަން އެއީ ހަމަ ވަހުމެކެވެ. ދަޅައެކެވެ. އަވާ މެންދުރެކެވެ. ރަނގަޅަށް ލޯހުޅުވައިގެން ބަލައިލައިފިނަމަ މިކަމުގެ ޙަޤީޤަތް ކޮންމެ މީހަކަށްވެސް ފެންނާނެއެވެ. ބަލައިލި ކޮންމެ ދިމާލަކުންވެސް ފެންނާނެއެވެ. އެކަން ސާބިތުކޮށްދިނުމަކީ ދާދި ފަސޭހަކަމެކެވެ. ތަފާތު ޤައުމުތަކުގެ ސަރުކާރުތަކާއި ބޮޑެތިކުންފުނިތަކާއި ވިޔަފާރިވެރިންގެ ވާހަކައެއް އަޅުގަނޑު ނުދައްކާނަމެވެ. ޢާއިލީ ގުޅުމާއި ޖަމާޢަތް ޖަމާޢަތުގެ ވާހަކަވެސް އެހަށްބާއްވާށެވެ. މިއުޒިކާއި މުނިފޫހި ފިލުވުމުގެ ދާއިރާވެސް އެހަށް އެއްކިބާ ކުރުމާހިނގާށެވެ. އަޅުގަނޑުހަމައެކަނި ފާހަގަކޮށްލަން މިވަގުތު ބޭނުންވަނީ ކުޅިވަރެވެ. ތަފާތު އެކި ތަންތާގައި ތަފާތު ނަންނަމުގައި ތަފާތު ގޮތްގޮތަށް ކުޅެވޭ ކުޅިވަރުތަކެވެ. އަންހެނުންވެސް އަދި ފިރިހެނުންވެސް ކުޅޭ ކުޅިވަރުތަކެވެ. އަންހެނުންވެސް އަދި ފިރިހެނުންވެސް ބަލާ ކުޅިވަރުތަކެވެ.

އެވެރިންގެ ތެރޭގައި ކުޅެވޭ ހުރިހާ ކުޅިވަރެއްގައިހެން އަންހެނުން ނަމަ އަޅަން މިޖެހެނީ ވަރަށް ނިވާކަންކުޑަ ހަށިގަނޑުގެ ބޮޑުބައެއް ހާމަވާފަދަ ހެދުންތަކެވެ. އަޖައިބުވާންޖެހޭ ކަމަކީ ހަމައެކުޅިވަރުތައް ފިރިހެނުން ކުޅޭއިރު ހަށިގަނޑުގެ ބޮޑުބައެއްނިވާކުރާކަމެވެ. މިއިން ދޭހަވާއެއްޗަކީ އަންހެނުން މައިގަނޑު ގޮތެއްގައި މިބޭނުންކުރެވެނީ "ސެކްސް އޮބްޖެކްޓް" ތަކެއްގެ ގޮތުގައެވެ. އާދޭހެވެ. ފިރިހެނުންގެ ޖިންސީ ޣަރީޒާ ހޭލައްވާލާ އެކަމުގެ ކަރުހިއްކުން ބޮޑުކޮށް އަދި އެކަން ކެނޑުވުމަށް ބޭނުންކުރެވޭ ވަޞީލަތެއްގެ ގޮތުގައެވެ. ކުޅިވަރުތަކުގެ ޤަވާޢިދުތައް ކަނޑައަޅާ، ކުޅިވަރުތައް އިންތިޒާމްކުރުމުގައި ނުވަތަ ކުޅިވަރުތަކަށް ޚަރަދުކޮށް ސްޕޮންސަރުކުރުމުގައި އިސްސަފުގައި މިތިބެނީ ގިނައިން ފިރިހެނުންނެވެ. އެހެންކަމަށްވުމާއެކު އެވެރިންގެ މައިގަނޑުބޭނުމަކަށް ވެފައި މިއޮންނަނީ އެކުޅިވަރުތަކުގައި ބައިވެރިވާ އަންހެންވެރިންގެ ހަށިތައްނީލަންކިޔޭނެގޮތް ހެދުމެވެ. އަންހެނުންގެ ހުނަރާއި ކުޅަދާނަކަމަށްވުރެ ބޮޑަށް އެވެރިން ސަމާލުކަންދެނީ އަންހެނުންގެ ޖިސްމުތަކަށެވެ.

މިސާލަކަށް ޓެނިސް ނަގަމާ ހިނގާށެވެ. އަންހެނުން ލާން މިޖެހެނީ ޓޮޕަކާއި އެއާއި ގުޅިފައިވާ ފޫކޮޅުނުފޮރުވޭވަރުގެ މިނީސްކާޓެކެވެ. ޓޮޕް މިހުންނަނީ ގައިގެ ބައްޓަމަށް ގަޔަށް ބާރުކޮށެވެ. ކުޅިވަރުގެ ގަވާއިދު ބުނާގޮތުން އެމީހުންނަކަށް ފައިގެ ފަލަމަސްގަނޑު ނިވައެއްނުކުރެވެއެވެ. ކުޅެންމިޖެހެނީ ލައިގެން ހުންނަ ޖަނގިޔާ ދައްކައިގެންނެވެ. އެކަމަކު ފިރިހެނުންގަޔަށް ދޫކޮށް ހުންނަ ޓީޝާޓް ލާއިރު ކަކުލާއި ހަމައަށް ފޯރާ ސޯޓް ވެސް ލެވެއެވެ. ރަފައެލް ނަޑާލް އެނގިލައްވާތޯއެވެ؟ މިއީ މިމީހުން މިކިޔާ ޝަރާފަތެވެ. ހަމަހަމަ ކަމެވެ.

ދެން ބީޗްވޮލީއެވެ. މަޑުފަސްގަނޑުގައި ކޮޅެއްގަ ދެމީހުން ތިބެގެން ކުޅޭވޮލީއެވެ. ފިރިހެނުންނަމަ ޓީޝާޓާއި ސޯޓެވެ. އަންހެނުންތޯއެވެ. "ޓޫޕީސް" އެވެ. ބިކިނީއެވެ. އެންމެ އާދައިގެ ގޮތަށްނަމަ ޖަނގިޔަލާއި ބުރެޝިއަރެވެ. މިހެދުމުގައި ތިބެގެން ކުޅޭއިރު ވަށައިގެން ސަޕޯޓަރުން ތިބޭނެއެވެ. ޓީވީ ޗެނަލްތަކުން ދުރަށް ދައްކަމުންދާނެއެވެ.

ދެން އެތުލެޓިކްސް ނުވަތަ ކަސްރަތަށް ބައްލަވާށެވެ. އޭގެވެސް ގިނަޙަރަކާތްތަކުގައި ފިރިހެނުން ތިބޭނީ ޓީޝާޓާއި ސޯޓުގައެވެ. ގަޔަށް ދޫ ހެދުމުގައެވެ. އެކަމަކު އަންހެނުންނަމަ ހީވާނީ ގައިގައި ކުލަލާފައި ފޭރާމެއް ނުލާ ތިބޭފަދަޔަކުންނެވެ. އެމީހުން ދުވިޔަސް، ނެށިޔަސް، 'ބީމް' މަތީގައި އެކޮޅުކޮޅުން ޖެހުނަސް، ފުންމިޔަސް، ދަނޑީގައި އެލިގެން ބުރުއުކިޔަސް ނުވަތަ އެނޫންވެސް ކޮންމެ ކަމެއްކުރިޔަސް ޅިނދުންފެށިގެން ތިރިއޮންނާނީ ހާމައަށެވެ. އަދިއޭގެމަތީބައި ކޮނޑާއިހަމައަށް ފެންނާނީ ދަވާދުކާއްތައިގެން ތިބޭހެންނެވެ.

އައިސްކޭޓިންގ، ފިގަރސްކޭޓިންގ މިރޮނގުން ވަކިދެރައެއްނުވާނެއެވެ. އަންހެނުންގެހެދުން އާދައިގެ ރުމާލަކުންވެސް ފެހޭހާ ޚަރަދުކުޑަވާނެއެވެ. އެމީހުންލައިގެން ތިބޭ ހެދުންފެނިއްޖެނަމަ އެހެނދުން އެލަނީ ކޮންބޭނުމަކުތޯ ހިތުގައި ސުވާލުއުފެދޭހާ ވާނެއެވެ. އެކަމަކު ފިރިހެނުންގެ ހެދުމަކީ ހަމަ ކޯޓްފަޓުލޫނުފަދަ ހެދުމެކެވެ.  އަޖައިބެއްފަހެ ނުވާނެހެއްޔެވެ؟  ދުވަހަކަށްވުރެ ދުވަހެއް މިރޮގުން އަންހެނުންގެ ބަރަހަނާ ކުރެވޭލެއްމިދަނީ ބޮޑުވަމުންނެވެ. ދާދިފަހަކުން އަޅުގަނޑު އަޑުއެހި ޚަބަރެއްގައި 2012ގެ ލަންޑަން އޮލިމްޕްކްސްގައި ބޮކްސިންގައި ބައިވެރިވާ އަންހެން އެތުލީޓުންނަށް ސްކާޓްލާންޖެހުމަކީ އެކަށީގެންވާ ކަމެއްކަމުގައި ވެއެވެ. މިހާރު އެމީހުންގެ ހެދުމަކީ ޓީޝާޓާއި ކަކުލާއި ހަމައަށް ދާވަރުގެ ސޯޓެވެ. ދިގުސޯޓްގެ ބަދަލުގައި ސްކާރޓް ބޭނުންކުރަންފެށުމުން އެކުޅިވަރުގެތެރޭގައި އެ އެތުލީޓުން ބަރަހަނާވާ މިންވަރުބޮޑުވާނެކަމީ ހަމަ ޔަޤީންކަމެކެވެ.

ދެން ކުޅިވަރުކުޅޭ މީހުންނަށް ހިތްވަރުދީ ސަޕޯޓްކުރާކުރުމަށް ބަލާލަމާހިނގާށެވެ. ޗިއަރލީޑަރުންނަކީ ކުޅުންތެރިންނަށް ހިތްވަރުދީ ސަޕޯޓްކުރުމަށްޓަކައި ނަށާ އަދި ތަފާތު އެކްރޮބެޓިކް ޙަރަކާތްތައް ކުރާބައެކެވެ. ޢާއްމުގޮތެއްގައި މިމީހުން ފެންނަނީ ފިރިހެނުންކުޅޭ ކުޅިވަރުތަކުގެ މައިދާންތަކުންނެވެ. އެކަމުގައި އުޅެނީ އަންހެންކުދިންނެވެ. އެކުދިންގެ ޙަރަކާތްތަކާއި ހެދުން ހުންނާނީ ފިރިހެނުންގެ ސަމާލުކަން ވީހާވެސް ބޮޑަކަށް ލިބޭގޮތަށެވެ. އެކަމަކު އަންހެންކުދިންގެ ކުޅިވަރުތައް ކުރިއަށްދާއިރު ފިރިހެނުން އެފަދަ ޙަރަކާތްތައް ހިންގާތީއެއް ނުފެނެއެވެ. ޒުވާން ރީތި އަންހެންކުދިންތައް އެކުދިންގެ ހަށިގަނޑުއެއްކޮށްހެން ހާމަވާގޮތަށް ހެދުން އަޅައިގެން ދެއަތުން ޕޮންޕޮން ހިފައިގެން ދެސަފަށް ތިބޭއިރު ސްޕަރބޯލް ކުޅޭ ފިރިހެނުންތައް އެދެސަފު ދޭތެރެއިން ދަނޑަށް އަރާއިރު އަދި ކުޅިބަލަން ވަދެ ތިބޭ އެންމެން ސަޕޯޓްކުރުމުގެ ގޮތުން ހަޅޭއްލަވާއިރު އެއަންހެންކުދިންގެ ޝަރާފަތާއި ކަރާމަތާއި ޢިއްޒަތަކީ ކޮބައިހެއްޔެވެ؟ އެއަންހެންކުދިންއެކުޅޭ ރޯލު ފިރިހެނުން ނުކުޅޭއިރު އެބުނާ ހަމަހަމަކަމަކީ ކޮބައިހެއްޔެވެ؟

ބައިސްކަލު، ސައިކަލް އަދި ކާރުރޭސްތަކުގައި ވެސް ހަމަމިއުސޫލުން އަންހެންކުދިން ބޭނުންކުރެވެމުންދެއެވެ. ފޯމިއުލާ ވަން ފަދަ ކާރުރޭސްތަކުގައި ، ޓުއަރޑިފުރާންސް ފަދަ ބައިސްކަލު ރޭސްތަކުގައި އަދި މިނޫންވެސް ރޭސްތަކުގެ އެކިކަންކަމުގައި އެކި ޙާލަތްތަކުގެ އަންހެންކުދިންގެ އޮރިޔާންކަން އިސްތިހާރުކުރެވެމުންދެއެވެ. އެކުދިން އެރޭސްތަކުގެ ކަންކަމުގައި ބޭނުންކުރެވެމުންދަނީ އެކުދިންގެހުރި ވަކިހުނަރެއްގެ ސަބަބަކުން ނޫނެވެ. ހަމައެކަނި އެކުދިންގެ ޖިސްމުތައް އިސްތިހާރުކޮށް އެމީހުންގެ އެ ކުޅިވަރުތައް ބޮޑުއަގުގައި ވިއްކާ ފައިސާ ހޯދުމުމަށެވެ.

އަދި މީގެއިތުރުން ތަފާތުކުޅިވަރުތަކުގައި ބޭނުންކުރެވޭ ' ބޯލްބޯއިސް ' އަދި ' ބޯލްގާރލްސް ' އަށް ބެއްލެވިޔަސް މިތަފާތު ފެންނާނެއެވެ. އެގޮތުން މިވަގުތު އިނގިރޭސިވިލާތުގައި ކުރިޔަށްދާ ދުނިޔޭގެ އެންމެ ގަދަ ފިރިހެން އަށް ކުޅުންތެރިންގެ މުބާރާތުގެ މެޗެއް ބައްލަވާލެއްވިޔަސް މީގެ ޙަޤީޤަތް ސާފުކޮށް ފެނިވަޑައިގަންނަވާނެއެވެ.

ކުޅިވަރުގެ މުބާރާތްތަކުގައި ދެވޭ އިނާމަށް ބަލައިލިކަމުގައިވެސް އެބުނާ ހަމަހަމަކަން އެއޮތީ ފެންނާށެވެ. އަންހެނުން އެހާ ބޮޑަށް ބަރަހަނާވާންޖެހޭއިރުވެސް ކޮންމެ ކުޅިވަރެއްގައިހެން މުބާރާތްތައް ކާމިޔާބުކުރާ ކުޅުންތެރިންނަށް ދެވޭ ފައިސާގެ އިނާމަށް ބަލާލާއިރު ފިރިހެނުންނަށްވުރެ އަންހެނުންނަށް ދެވޭ ފައިސާގެ ޢަދަދު އެތައްގުނައަކުން ކުޑައެވެ. ތިޔަބޭފުޅުން އަމިއްލައަށް  'ގޫގުލް'  ކޮށްލެއްވިޔަސް ތަފުޞީލުފެނިވަޑައިގަންނަވާނެއެވެ.

ލޮބުވެތި އަޚުންނާއި އުޚުތުންނޭވެ. ހުނޅަގުގެ އަދި އެނޫންވެސް ކާފަރު ޤައުމުތަކުގެ މައިގަނޑު ސިޔާސަތަކީ އަޅުގަނޑުމެންގެ ލޮބުވެތި މަންމަމެންނާއި، އަނބިންނާއި، އުޚުތުންނާއި އަދި އަންހެންދަރިން އެޖިންސަކަށް ނިސްބަތްވާ އަންހެނުންޖިންސްގެ ޢިއްޒަތާއި ޝަރަފާއި ކަރާމާތް ރައްކާތެރިކުރުމެއްނޫނެވެ. އަދި ކިއެއްހެއްޔެވެ. އެކަން ވެއްޔާ މޮޑެލުމެވެ. އެކަނބަލުންގެ ހަށިތަކަކީ ފިރިހެނުންގެ ލޮލަށް "ޖާފަތެއް" ކަމުގައި ހެދުމެވެ. ދިރިއުޅުމުގެ ކޮންމެ ކަމެއްގައިވެސް ކަންތައްތައް އޮތީ މިފަދައަކުންނެވެ. އަޅުގަނޑު މިއަލިއަޅުވާލީ ހަމައެކަނި ކުޅިވަރުގެ ދާއިރާއަށެވެ. ޙަޤީޤަތުގައި ކުޅިވަރަކީ އޭގައި ބެލުންތެރިންގެ ސަމާލުކަން ކުޅުންތެރިންގެ ހުނަރަށާއި ބުންވަރަށާއި ކުޅަދާނަކަމަށް ހުއްޓޭ ޙަރަކާތެވެ. އެކަމަކު ކުޅުންތެރިންނަކީ އަންހެނުންކަމުގައިވަނީނަމަ މިހުރިހާކަމެއްގެ މައްޗަށް އިސްވަނީ ކުޅުންތެރިންގެ ހަށިގަނޑުތަކެވެ. އަދި ޚާއްޞަކޮށް ޓެނިސްކަހަލަ ވަކިވަކި ކުޅުންތެރިން ތަމްސީލު ކުރާ ކުޅިވަރުތަކުގައި މަޝްހޫރުކަމާއި ގިނަފައިސާ ހޯދުމުގައި އެކުޅުންތެރިންގެ ހަށިގަނޑަކީ ވަރަށް އިސްރޯލެއްއަދާކުރާ އެއްޗަކަށް މިވަނީ ވެފައެވެ. ގިނަ ސްޕޮންސަރޝިޕްތައް މިލިބެނީ ރީތި އަދި ވީހާވެސް ބޮޑަކަށް ހަށިގަނޑު ހާމަކޮށް ބަރަހަނާވާ ކުޅުންތެރިންނަށެވެ. މިއީ ޕިއްލޭ މެން އަންހެނުންނަށް އެހޯދައިދޭ ޢިއްޒަތާއި ޝަރާފަތެވެ. މިއީ އޭގެ ހަމަ ވަރަށް ކުޑަކުޑަ މިންވަރެކެވެ. ބޮޑުބައި އަދިއޮތީއެވެ. އެކަންތައްތައް ހާމަކުރުމަށްޓަކައި އެތައް ޞަފުޙާއެއް ލިޔަންޖެހޭނެއެވެ. އާދޭހެވެ! އަންހެނެއްވިއްޔާ؟؟؟؟؟؟؟  ތިހީފުޅުކުރެއްވީ އެންމެ ރަނގަޅަށެވެ. އަންހެނެއްވިއްޔާ ޖެހޭނީ ވީހާވެސް ބޮޑަކަށް ހަށިގަނޑު ހާމަކުރާށެވެ. ހަންގަނޑު ހާމަކުރާށެވެ. އަންހެނެއްވިއްޔާ ހަންގަނޑެވެ.